Բարձրացող Քաղաքական Դէմքը՝ Յ. Շիթիլեան

Դոկտ. Մինաս Գոճայեան, Մոնթրէալ-Լոս Անճելըս, 10 Դեկտեմբեր 2013

Հոկտեմբեր 27-ին, keghart.com կայքէջի նախաձեռնութեամբ, Թորոնթոյի մէջ կազմակերպուած էր դռնբաց քննարկում մը՝ «Սփիւռքահայութեան անտարբերութիւնը քաղաքական կեանքէն ներս. Առասպէ՞լ, թէ՝ Իրականութիւն» վերնագրով: Քննարկման չորս մասնակիցներէն երեքը երիտասարդներ էին եւ բոլորն ալ անկախ իրարմէ՝ կը մատնանշէին հայ երիտասարդներու եւ հայ համայնքին հեռու մնալու պարագան տեղական քաղաքական աշխոյժ կեանքէն: Անոնք կոչ կ'ընէին թէ՛ համայնքին եւ թէ՛ երիտասարդներուն չխուսափիլ տեղական կառավարման մարմիններու մաս կազմելու գործընթացէն: Մասնակիցները կը շեշտէին քաղաքական ընտրութեանց ու կեանքին մասնակցելու անհրաժեշտութիւնը՝ ցոյց տալով այն օգուտները, զորս կարելի է քաղել նման  մասնակցութիւններէ: [Նայիլ Political Apathy: Myth or Reality? (Video)]


Դոկտ. Մինաս Գոճայեան, Մոնթրէալ-Լոս Անճելըս, 10 Դեկտեմբեր 2013

Հոկտեմբեր 27-ին, keghart.com կայքէջի նախաձեռնութեամբ, Թորոնթոյի մէջ կազմակերպուած էր դռնբաց քննարկում մը՝ «Սփիւռքահայութեան անտարբերութիւնը քաղաքական կեանքէն ներս. Առասպէ՞լ, թէ՝ Իրականութիւն» վերնագրով: Քննարկման չորս մասնակիցներէն երեքը երիտասարդներ էին եւ բոլորն ալ անկախ իրարմէ՝ կը մատնանշէին հայ երիտասարդներու եւ հայ համայնքին հեռու մնալու պարագան տեղական քաղաքական աշխոյժ կեանքէն: Անոնք կոչ կ'ընէին թէ՛ համայնքին եւ թէ՛ երիտասարդներուն չխուսափիլ տեղական կառավարման մարմիններու մաս կազմելու գործընթացէն: Մասնակիցները կը շեշտէին քաղաքական ընտրութեանց ու կեանքին մասնակցելու անհրաժեշտութիւնը՝ ցոյց տալով այն օգուտները, զորս կարելի է քաղել նման  մասնակցութիւններէ: [Նայիլ Political Apathy: Myth or Reality? (Video)]

Ուրախութեամբ եւ հպարտութեամբ պէտք է նշեմ որ Մոնթրէալի շրջանին մէջ հետզհետէ անուն հանող եւ Քանատայի քաղաքական-կուսակցական կեանքին մէջ բարձրացող դէմքերէն է Յարութ Շիթիլեան, որ թէեւ մասնագիտացած եւ աշխատած է ճարտարագիտութեան ճիւղին հեռահաղորդակցման մասնաճիւղին մէջ, աշխուժօրէն ներգրաւուած է նաեւ տեղական քաղաքապետական կեանքէն ներս:

Գեղադէմ այս երիտասարդը ծնած է Պէյրութ, ուրկէ ինը տարեկանին ծնողներուն հետ գաղթած է Քանատա: Նախնական եւ միջնակարգ ուսումը ստացած է ՀԲԸՄ-ի Ալեքս Մանուկեան վարժարանէն ներս, որմէ ետք յաճախած է ֆրանսերէն լեզուի դպրոց: Գործօն կերպով մասնակցած է լողի, ջրագնդակի եւ պասքէթպոլի մարզաձեւերուն, այնուհետեւ աւարտած է ճարտագիտական վերոյիշեալ բաժինը: Աշխատած է Շուէտական Էրիքսոն հիմնարկին մէջ որպէս միջազգային գործերու գծով խորհրդական՝ Լատինական Ամերիկա, Արեւմտեան Եւրոպա եւ Միացեալ Նահանգներ: Այնուհետեւ ան հիմնած է իր սեփական խորհրդատուական կեդրոնը տեղեկատւութեան եւ հեռահաղորդակցման բնագաւառէն ներս:  

2009-ին Յարութ Շիթիլեան կը սկսի աւելի հանգամանօրէն հետաքրքրուիլ քաղաքապետական կեանքով եւ լրջօրէն կը պատրաստուի մասնակցիլ ընտրութիւններուն եւ կ'ընտրուի Մոնթրէալի Ահունցիք-Քարթիէվիլ-ի քաղաքային խորհուրդի անդամ: Մինչեւ 2011-ի Յունիսը ան փոխ-նախագահն էր քաղաքային բարելաւման Խորհրդակցական Վարչութեան: 20 Յունիս 2011-ին Յ. Շիթիլեան 30 տարեկանին կ'ընտրուի  Մոնթրէալի  Քաղաքային Խորհուրդի խօսնակ (speaker)՝ հանդիսանալով ամենէն երիտասարդ անձը այդ պաշտօնը գրաւող Մոնթրէալի պատմութեան մէջ: 2013-ի Յունիսին, յետ հրաժարման Մոնթրէալի քաղաքապետ Մայքըլ Ափլպոմի, Շիթիլեան իր թեկնածութիւնը կը դնէ Մոնթրէալի քաղաքապետի փոխանցման շրջանի պաշտօնին եւ սակայն միայն ձայներու  չնչին տարբերութեամբ իր դիրքը կը զիջի Լորան Պլաշար թեկնածուին:

Բոլորովին վերջերս, 2013-ի աշնան, Մոնթրէալի քաղաքապետական ընտրութիւններու առնչութեամբ կրկին աշխուժութիւն կը տիրէր քաղաքին մէջ: Նոյեմբեր 3-ին, Պորտօ-Քարթիվիլի քաղաքացիները վերընտրեցին Յարութ Շիթիլեանը որպէս իրենց Քաղաքապետական Խորհուրդի անդամ՝ ստանալով ընտրամասի քուէարկողներու ընդհանուր ձայներուն 48.88 տոկոսը: Իր հետ հինգերորդ անգամ ըլլալով վերընտրուեցաւ նաեւ Մարի Տէրոս Չաւուշեանը: Ընտրապայքարին կը մասնակցէին վեց հայ թեկնածուներ:

Քանատայի տեղական-քաղաքապետական կեանքին մէջ հետզհետէ բարձրացող հայազգի մեր երիտասարդ հանրային սպասաւորը Նոյեմբեր 18-ին նշանակուեցաւ Մոնթրէալ քաղաքի Գործադիր Վարչութեան փոխ-նախագահի պաշտօնին: Ան միաժամանակ պատասխանատուն պիտի ըլլայ Վարչական Բարեփոխումներու Smart City եւ Տեղեկատւութեանց  Արուեստագիտութեան (Information Technology):

Եղիշէ Չարենց դեռեւս հարիւր տարի առաջ գրած էր. «Թէ ուզում ես ձայնդ լսեն, ժամանակիդ շունչը դարձիր»: Ահաւասիկ այն տիպար երիտասարդը, որ Քանատայի մէջ, անսալով իր ներքին ձայնին ու վստահելով իր ուժերուն ու հայ համայնքի անվերապահ զօրակցութեան, նաեւ մէկդի դնելով զանազան նախապաշարումներ, դարձած է իր ժամանակի շունչը, որ թարմութիւն ու նորութիւն կը խոստանայ: Մեր ակնկալութիւնն է որ շատ հայ երիտասարդներ հետեւին Յարութի օրինակին եւ աներկիւղ նետուին իրենց համար հայրենիք ընտրած երկիրներու քաղաքական եռուզեռին մէջ ու այդ ճանապարհով օգտակար հանդիսանան բոլոր քաղաքացիներուն անխտիր ու մասնաւորաբար հայ համայնքին ու հայրենիքին: Յիշեցնենք որ Յարութ Շիթիլեան 2010-ին Մոնթրէալի այն ատենուան քաղաքապետ Ճերար Թրամպլէի հետ այցելած էր Հայաստան:

Յարութիւն Շիթիլեան կազմած է հայկական իր բոյնը ատամնաբոյժ Օլեա Մարգարեանի հետ:

Նորանոր յաջողութիւններ Յարութիւն Շիթիլեանին եւ Մարի Տէրոս Չաւուշեանին:

Յաջորդիւ յատուկ յօդուածով մը կ'անդրադառնանք Մարի Տէրոս Զաւուշեանի (Mary Deros Tsaoussian) գործունէութեան մասին.-Խմբ.

 

 

You May Also Like