Հաւատացէ՛ք Նոր Սերունդին

Sentinel of Truth – «Ճշմարտութեան Պահպանը», Հեղինակ` Տիգրան Գալայճեան

Թորոս Թորանեան, Պէյրութ, 27 Օգոստոս 2013

Ահա այս անգլերէն գիրքին ամբողջական խորագիրը.- «Ճշմարտութեան Պահապանը` Գուրգէն Եանըգեան Եւ Հայոց Ցեղասպանութեան Ուրացման Դէմ Պայքարը»:

Զարմանալի չգտնէք, որ այս գիրքին հեղինակը Կիպրոս ծնած Պետրոս Գալայճեանի որդին է: Իր մեծ հայրը` Ռուբէն, Ցեղասպանութեան հրդեհներէն ճողոպրած հայ մը, այդ ոգին փոխանցած է իր որդիներուն` Արամին եւ Պետրոսին, Պետրոսը իր հերթին իր որդւոյն` Տիգրան Գալայճեանին:

Sentinel of Truth – «Ճշմարտութեան Պահպանը», Հեղինակ` Տիգրան Գալայճեան

Թորոս Թորանեան, Պէյրութ, 27 Օգոստոս 2013

Ահա այս անգլերէն գիրքին ամբողջական խորագիրը.- «Ճշմարտութեան Պահապանը` Գուրգէն Եանըգեան Եւ Հայոց Ցեղասպանութեան Ուրացման Դէմ Պայքարը»:

Զարմանալի չգտնէք, որ այս գիրքին հեղինակը Կիպրոս ծնած Պետրոս Գալայճեանի որդին է: Իր մեծ հայրը` Ռուբէն, Ցեղասպանութեան հրդեհներէն ճողոպրած հայ մը, այդ ոգին փոխանցած է իր որդիներուն` Արամին եւ Պետրոսին, Պետրոսը իր հերթին իր որդւոյն` Տիգրան Գալայճեանին:

Թուրքը սկիզբը կարծեց, թէ կրնար հայը աշխարհի քարտէսէն ջնջել: Երբ չյաջողեցաւ սկսաւ դիմել ուրացումի քաղաքականութեան: Իրենք եւս ունին հայկական այս առածը.- Սուտին ոտքը կարճ կ’ըլլայ: Միթէ չէի՞ն գիտեր, որ ուրացումի կրկնումը նոյն ուրացումը կը տանի ճշմարտութեան:

Նոր սերունդի զաւակ է Տիգրան Գալայճեան  եւ ահա զարմանալի զուգադիպութեամբ նոյն` Կիպրոսի հողին վրայ ծնան մեր երիտասարդներէն Արա Սարաֆեան, զաւակը մելգոնեանցիներ Տէր եւ Տիկին Մարգար Սարաֆեաններու, որ տարներէ ի վեր կը զբաղի Ցեղասպանութեան հարցով:

Այլ զուգադիպութիւն` Կիպրոս ուսանած Անդրանիկ Պօպէլեան մելգոնեանցիին երէց որդին` Մայքըլ Պօպէլեանը նոյնպէս անգլերէն լեզուով գիրք հեղինակած է Հայոց Ցեղասպանութեան շուրջ,  զայն  կոչելով «Հայաստանի Երախաները» ուր անդրադրձած է նաեւ Գուրգէն Եանըգեանի գործունէութեան:

Վստահեցէք մեր նոր սերունդին: Նաեւ գալիք սերունդներուն, անոնք մեզ կրնան անակնկալի բերել: Միայն ապառաժի վրայ դրուած ըլլան նոր սերունդներու ընտանեկան դաստիարակութիւնը, ինչպէս վերոյիշեալ անուններու դաստիարակութիւնը եղած է:

Տիգրան Գալայճեան իր նիւթին տիրապետելու համար ուսումնասիրած է Գուրգէն Եանըգեանի ամբողջ կեանքը` անոր ծնունդէն մինչեւ մահը:

Միաժամանակ խոր գիտակ ըլլալու համար Հայոց Ցեղասպանութեան հիմնական պատճառներուն եւ գեհենային գործադրութեան, դիմած է բազմատասնեակ գիրքերու` հայրենական ընտանիքին մէջ իր լսածները ամրագրելով:

Վէպ մը չէ այս գիրքը եւ ոչ ալ հեքիաթ մը, բայց կը կարդացուի վէպի մը կամ հեքիաթի մը պէս:

Դէմքերը կ’անցնին արագ: Կարին ծնած Գուրգէն Եանըգեանը ականատես կ’ըլլայ թուրքերու կողմէ իր աւագ եղբօր` Յակոբին գլխատումին, տակաւին ինք մանուկ եւ մօրը լեղապատաառ դառնալուն:

Մեր տեսադաշտին առջեւ կ’անցնի Եանըգեանի կեանքը շարժանկարային տեսարաններու պէս, անոր ուսումը, անոր թափառումները- Կովկաս, Մոսկուա, Եւրոպա, Պարսկաստան, Միջին Արեւելք եւ Ամերիկա, անոր վրէժի զգացումին ջրդեղուիլը, Արեւմուտքի եւ Ամերիկայի մեծ լռութիւնը Հայոց Ցեղասպանութեան շուրջ, թուրքին ուրացումի քաղաքականութիւնն ու ասոնց բոլորին մէջ իր Յակոբ եղբօր խուժդուժ սպանութիւնը, որ խելագարութեան աստիճանին կը հասցնէ Եանըգեան բազմակողմանի զարգացում ունեցող` գեղարուեստական երկերու հեղինակ երիտասարդը, այլ ծերութեան սեմին հասած Եանըգեանը կը մղէ Լոս Անճելըսի մէջ զգետնելու երկու թուրք դիւանագէտներ:

Իր նպատակը. Գուրգէն Եանըգեանի գերագոյն նապատակը իր փամբուշտները թուրքին միջոցով մեծ պետութիւններուն ուղղելն էր, որոնք քաղաքական շահերու ետեւէ ըլլալով` թուրքին թիկունք կանգնելով անտեսումի քաղաքականութիւնը կը վարէին հայութեան պահանջատիրութեան դէմ:

Եանըգեանը միաժամանակ կ’ափսոսար, որ հայուն Ցեղասպանութիւնէն ետք գրեթէ վաթսուն տարիներուն ընթացքին չէր պատահած այն` ինչ որ ըրաւ ինք, բացի Մեծ Եղեռնի վաղորդայնին մեծագոյն ոճրագործներուն, Ցեղասպանութեան կազմակերպիչներուն դիտապաստ գետին բռուելէն Սողոմոն Թեհլիրեանի եւ իր ընկերներուն կողմէ:

Այնքան ստորին քաղաքականութիւն կը վարէին այսպէս կոչուած մեծ պետութիւնները, որ 1918-ի Հոկտեմբերին վերջնականապէս պարտուած Թուրքիան, յաղթական ազգի մը վերածեցին Մուսթաֆա Քեմալի միջոցաւ:

Անգլիան էր, որ ազատութիւն կը շնորհէր դահճապետներուն` Թալէաթին, Էնվէրին, Ճեմալին, Ճիվանշիրին եւ միւսներուն, առանց իմանալու, որ հայ վրիժառուներու անվրէպ գնդակները եւրոպական քաղաքներէն մինչեւ Թիֆլիս ու Պուխարա, անոնց մարմիններուն արեամբ պիտի ներկէին այդ քաղաքներուն փողոցները:

77 տարեկան Եանըգեան գիտակից մահուան գնաց` միջոց մը մտածելով, որ ինք եւս Թեհլիրեանին նման անպարտ կ’արձակուի: Բայց երբ ան յանձնուեցաւ բանտի խուցին, իմացաւ իր գործին շարունակուիլը` որուն վստահութիւնը ունէր արդէն:

Մեծ առաջնորդին օրինակով կամ օրինակէն ծնունդ առաւ ԱՍԱԼԱ – Հայաստանի Ազատագրութեան Հայ Գաղտնի Բանակ կազմակերպութիւնը, որուն պատմութիւնը եւս ամփոփ կերպով ուսումնասիրած է Տիգրան Գալայճեանը` ընելով թւումն մասանցը այս կազմակերպութեան քառասունէ աւելի գործողութիւններուն, ոչ միայն Մերձաւոր Արեւելքի եւ Եւրոպայի մայրաքաղաքներու` այլ նոյնինքն Թուրքիոյ մայրաքաղաք Անգարայի մէջ, թուրքին որջին մէջ, Եանըգեանի ծննդավայրին անուան` «Կարին» գործողութեամբ, ուր յետոյ բանտին մէջ թուրքերը կախաղան բարձրացնելով այդ գործողութեան մասնակից գերեվարուած հայորդին, հայոց ժամանակակից պատմութեան բեմը բարձրացուցած եղան հերոս Լեւոն Էքմէքճեանը:

Հայ երիտասարդութիւնը զարթնումի շրջան մը բոլորեց: Նոյն ժամանակամիջոցին այլ կազմակերպութիւն մըն ալ մէջտեղ եկաւ` Հայոց Ցեղասպանութեան Արդարութեան Մարտիկները, որ նոյնպէս թուրք դիւանագէտներ սպաննեց:

Այդ բոլորը ցնցեց Թուրքիան, որ դիմեց բազմաթիւ միջոցներու, որպէսզի իր քաղաքական գործիչները ապահով ըլլան:

Իրար անցան նաեւ մեծ պետութիւնները, որովհետեւ ԱՍԱԼԱն ամէն տեղ էր, Ճշմարտութեան Պահակները ամէն տեղ էին` Լիբանանէն մինչեւ Պոլսոյ Փակ  շուկաները, Իրանէն մինչեւ Յունաստան, Եւրոպա եւ Ամերիկա, Փարիզի թրքական հիւպատոսարանի «Վան» գործողութեամբ գրաւումէն եւ Օրլիի օդանաւակայանէն մինչեւ Պուտափեշտ:

Հեղինակին գրիչին տակէն ԱՍԱԼԱի զինեալ տղաքը իրենց փամբուշտակալներով կը սուրան մայրաքաղաքէ մայրաքաղաք հաստատելով, թէ իրենք տեռօրիստներ` ահբեկիչներ չեն, որ իրենք արդար դատի մը համար` Հայոց Արդար Դատին համար կը դիմեն զէնքի, քանի այլապէս լուռ է աշխարհ` սատկած լէշի  լռութեամբ եւ այն պետութիւնը, որ լռութիւն կը պահէ Հայոց Ցեղասպանութեան մասին, մահ բերած կ’ըլլայ աշխարհին: Ասոր լաւագոյն ապացոյցը Եանըգեանը դատող դատարանին դատախազին տասնեակ տարիներ ետք կատարած մեղայական խոստովանութիւնն է, թէ ինք սխալ կատարած էր չձգելով, որ Եանըգեան դատարանին մէջ իր արարքը պաշտպանէ` Հայոց Ցեղասպանութեան իրողութեան վրայ հիմնուելով:

Ընթերցողներ, գտէ՛ք Տիգրան Գալայճեանին այս գիրքը ու անպայման կարդացէք: Գիրքը տպուած է Ամերիկայի մէջ, այս տարի` 2013 թուականին:

Այս գիրքը մեզի կ’ըսէ.- Հաւատացէ՛ք նոր սերունդին: