Նուիրեալները

A Decrease font size. A Reset font size. A Increase font size.

Մեթր Պարգև Դաւիթեան, Թորոնթօ, 5 Ապրիլ 2016

Ապրիլ 1-ը ճանչցուած է որպէս կատակի և ճերմակ սուտերով զուարճանալու օր։

Այդ օր, սակայն, Արցախի քաջարի ժողովուրդը որ կատակի կամ զուարճանալու ո՛չ սիրտ և ո՛չ ալ տրամադրութիւն ունի, Ազէրիներու կողմէ լայնածաւալ յարձակումի ենթարկուելէ ետք փաստեց որ կատակ չվերցներ և պատրաստ է խիստ հակահարուած տալու պաշտպանելու համար իր հողը և բարձր պահելու համար իր ազգին պատիւը։

Ամէն հայ որքան ալ տարակարծիք ըլլայ Հայաստանի մէջ կիրարկուած քաղաքական ու տնտեսական խնդիրներու և հարցերու շուրջ, և կամ որքան ալ կասկածամտութեամբ դիտէ հայրենիքի մէջ կատարուած ազգային աշխատանքը ղեկավար քաղաքական մարդոց, կասկածէ վեր կը մնայ անտարակոյս նուիրուածութիւնը հայ զինուորին ու երկրապահ ազատամարտիկին իր հողին ու հայրենիքին հանդէպ։

Մեթր Պարգև Դաւիթեան, Թորոնթօ, 5 Ապրիլ 2016

Ապրիլ 1-ը ճանչցուած է որպէս կատակի և ճերմակ սուտերով զուարճանալու օր։

Երբեմն կասկածամտութիւնը ոմանց նոյնիսկ կը մեղանչէ հարցականի տակ դնելով հայ ազգային բանակի ուժն ու զօրութիւնը ի տես մաշումի ((Attrition) քաղաքականութեան մը առջև որ Ազէրին կը հետապնդէ տարիներէ ի վեր թեթեւ բախումներու(skirmishes) ձևով։ Ինչո՞ւ, կ'ըսեն ոմանք, եթէ զօրաւոր ենք, մենք ալ՝ Իսրայէլի պէս և անոր օրինակով, քանի մը զինուորականի մահէն կամ կորուստէն ետք տակնուվրայ չենք ըներ հակառակորդի (այս պարագային Ազէրիներու) հիմնական կառոյցները (Infrastructure)։

Պատասխանը այդպիսի կասկածամիտներու հարցումին գուցէ կը կայանայ Ռուս միջնարարի դերին մէջ որ միջազգային հաշիւներ նկատի ունենալով կ'ուզէ մեր ձեռքերը բռնել կամ կապել. կամ գուցէ կը կայանայ սփիւռքահայութեան լոպիներու տկարութենէն որ չունին Հրէական լոպիներու ուժն ու զօրութիւնը աշխարհի մէջ. կամ, Աստուած չընէ, գուցէ մեր ազգային բանակը օժտուած չէ առաջատար (advanced) արդիական ռազմամթերքով , այլ անոր ուժը կախեալ է մեծապէս իր զինուորի մարտունակութեան և զոհողութեան ոգիէն և հողին ու հայրենիքին հանդէպ անոր ունեցած պաշտամունքի զգացումէն։

Ապրիլ 1-ով սկսող ամիսը հայուն ամիս է նաև ցաւի ու ցասումի, յիշելու, պահանջելու, քայլարշաւ կազմակերպելու և իր ցեղասպանեալ ազգի իրաւունքները հետապնդելու։

Ահա թէ ինչու՞ Ապրիլի սկիզբին տրուած Ազէրի հարուածը Արցախին կրկնակի ցաւ է և մեր դարաւոր վէրքը կը քշտէ (poke)։ Զայրոյթով լեցուն է հա՛յը հայուն հանդէպ բոլոր անոնց որոնք ինքնաորոշումի (self-determination) արդար ուղիով քալող Արցախի մեր ժողովուրդին, մեր քոյրերուն ու եղբայրներուն, մամիկներուն, պապիկներուն և մանուկներուն, ուղղակի կամ անուղղակի ձեւով, զոհեր կը պատճառեն, քիթը կ'արիւնեն կամ քունը կը փախցնեն, ըլլան անոնք Ազէրիներ, կամ անոնց գործակից Թուրք կամ Իսրայէլացի զինուորական սարքեր կամ խորհրդատուներ։ և եթէ Սուրիոյ մէջ Ռուսին կողմէ ամօթով պարտուող Թուրքիան Ազէրիներուն կ'ուզէ գործածել անհանգիստ դարձնելու համար հայու դաշնակից Ռուսիան, այն ատեն կռուախնձոր դառնալու վիճակուած Արցախն ու իր հետ հայ ժողովուրդը իրաւունք ունին ակնկալելու Ռուսիոյ անվերապահ թիկունքը որպէսզի Արցախն ու Հայաստանը դառնան Կովկասի տարածաշրջանի անընկճելի տիրական ուժը։

Ժամանակ է որ Ռուսիան ճանչնայ մեզ որպէս իր շահերու պաշտպանը Կովկասի մէջ ինչպէս Ամերիկան կը ճանչնայ Իսրայէլը որպէս իր շահերու պաշտպանը Միջին Արեւելքի մէջ։ Ու եթէ ամէն Ամերիկացի նախագահ կամ ծերակոյտ ու քոնկրէսական մրցումի կ'ելլեն Իսրայէլի բացարձակ ապահովութիւնը երաշխաւորելու, թող ամէն Ռուս նախագահ և քաղաքական կամ զինուորական պատասխանատու մրցումի ելլեն իրենք ալ որպէսզի երաշխաւորեն ապահովութիւնը Հայաստանի և Արցախի։

Թող նաև մեր նախագահն ու քաղաքական ղեկավարութինը և մեծահարուստ Օլիկարգները Հայաստանի, չբաւականան փչելով կրակը մեր ժողովուրդի մարտունակ ազգային ոգիին, այլ ստեղծեն առիթ ու մթնոլորտ որ մեր հնարամիտ ու պայծառամիտ երիտասարդութիւնը, Հայաստանի մէջ և սփիւռքի, ձեռք ձեռքի տուած աշխատին գիտական յառաջդիմութեամբ հրաշքներ գործելու և առաջատար արդի զէնքեր արտադրելու և այդ ընելով մեր բանակը Իսրայէլի բանակի ուժին հաւասար դարձնելու, և այդ մակարդակով Ռուսիոյ գործակից դառնալու, փոխանակ անոր ուժին վստահելու կամ անոր գործակալը մնալու … ։

Ապրիլեան Եղեռնի յիշատակումի այս ամսուն կեցցեն ՆՈՒԻՐԵԱԼՆԵՐԸ հայ ազգին։ Անոնք որոնք յաճախ կ'ապրին գիւղական խոնարհ խրճիթներու մէջ կամ կը գտնուին Մեծարենցի նկարագրած "Դաշտի ճամբու մը վրան կամ ստորոտը լեռան" և կ'ըլլան առաջին անսացողները ահազանգի կանչին երբ հայրենիքը կը կանչէ և ազգի փրկութիւնը կը պահանջէ։ Անոնք մեր անթաղ զոհերու վրէժ պահանջող երկնային կանչի նօթերով քալող յաղթական շքերթի շարքերն են։ Անոնք մեր Արցախի հերոսներն են։

*****

ԵՐԲ ԹԱԽԻԾԸ ԿԸ ՊԱՏԷ ՈՒՐԱԽՈՒԹԻՒՆԸ
(Յետ Գրութիւն Նուիրեալները Յօդուածի, 7 Ապրիլ 2016)

Պերլինի մէջ, Ապրիլ 6-ին, Նախագահ Սարգսեան Չանսըլըր Անկելա Մերքելի հետ համատեղ ունեցած մամլոյ ասուլիսի ընթացքին հպարտօրէն կը յայտարարէր ըսելով, "Այո, մենք կռւում ենք հիմնականում 1980-ական թուականների զէնքով" և ատով հանդերձ, կ'ըսէր ան, Ազէրիներու կորուստը եղած է աւելի մեծ քան հայկականը։

Երեւանի մէջ, նոյն օրը, Ազգային Ժողովի նիստին, որ կը նկարասփռուէր Ա1 հայրենի հեռատեսիլի կայանէն, քանի մը պատգամաւոր կառավարութեան հարցում կ'ուղղէին թէ ինչ կը կատարուի մեր ազգային բանակի զինուժի աստիճանը առաջատար մակարդակի հասցնելու համար, որուն պատասխանելով Պաշտպանութեան նախարար Սէյրան Օհանեան կ'ըսէր թէ ծրագիր որդեգրուած է այդ առընչութեամբ որ բանակի զինուժը արդիական և առաջատար դառնայ։

Նոյն օրը նաև, Ստեփանակերտի մէջ, Ա1 հեռատեսիլի թղթակիցը կը զրուցէր գրող Զօրի Պալայեանի և ՀՅԴ Պիւրոյի անդամ Արման Ռուստամեանի հետ որոնք կը խօսէին Ազէրի կողմին գործած վայրագ ոճիրներու և թղծածրար պատրաստելու մասին, որպէսզի միջազգային ատեաններու և կազմակերպութիւններու առջև ներկայացուի։

Այս բոլորին հետ մէկտեղ, ոտքի է հայութիւնը ամենուրեք և ուրախութիւնը կը պատէ բոլորս տեսնելով միահամուռ և միասնակամ կեցուածքը մեր բոլոր ազգային ուժերուն։ Առաւել, թշնամի ուժերը գիշերով և գաղտագողի մուտք գործած են հայկական գիւղ մը և "քաջագործութիւն" գործած ծերուկներու դէմ որմէ ետք առաւօտեան վաղ ժամերուն կա՛մ փախած են կա՛մ ալ շանսատակ եղած մեր քաջարի երիտասարդ մարտիկներու կողմէ։

Նման ազգայնաշունչ մթնոլորտի մէջ շատերու կողմէ քննադատելի պիտի թուի ձայն բարձրացնելը և ինքնաքննադատութիւն ընելը և հարց տալը թէ ինչպէ՞ս կ'ըլլայ որ մենք, ըստ նախագահ Սարգսեանի խօսքին, 1980-ական թուականներու զէնքով կը կռուինք ՏԱԿԱԻՒՆ։ Ինչպէ՞ս կ'ըլլայ որ մենք, ըստ Նախարար Օհանեանի խօսքին, ՏԱԿԱՒԻՆ ծրագիր կը մշակենք ազգային բանակի զինուժը արդիական և առաջատար մակարդակով օժտելու։ Եւ ինչպէ՞ս կ'ըլլայ որ մենք փոխանակ զօրաւոր դաստիարակիչ հակահարուած տալու մասին մտածելու, կը մտածենք բողոք ներկայացնելու (տկարի վայել) և կը խօսինք ֆաշիզմի արարք փաստող թղթածրար պատրաստելու մասին։

Մենք վաղուց գիտենք հայ մարդու մարտական ոգին և անոր անհաւասար պայքարներ մղելու պատրաստակամութիւնը։ Գիտենք նաև ղարաբաղցիներու հերոսութիւնը,Դաւիթ Բէկի շրջանէն մինջև Մարեշալ Բաղրամեան և Մարեշալ Բաբաջանեան և մինջև Արցախի ազատագրումի հերոս ազատամարտիկներ։ Թող ոչ ոք մեզի հայրենասիրութիւն չքարոզէ և այս ճակատագրական պահուն անհամութիւն յառաջացնելու մեղքով չմեղադրէ։ Եթէ տակաւին 1980-ական զէնքով կը կռուինք, ապա ինչո՞ւ չենք մտածած Ռուսիոյ յարգանքը վաստկիլ և անոր միլիոններով մեր գիտնականները գործի մղել որ սովետական շրջանի օրինակով ՄԻԿ-եր արտադրուին և ամենէն արդիական զինուժով բանակ կազմուի։

Այս շրջանին մեծ հետաքրքրութեամբ աշխարհ կը դիտէ Ամերիկայի մէջ տեղի ունեցող Նախագահական թեկնածուներու ընտրապայքարը։ Թեկնածու Պըրնի Սանտըրզը որուն ընտրապայքարի հիմնական լոզունգն է պայքարիլ ընդդէմ "կաշառակեր քաղաքական սիստեմ"ի կամ կամ "դրութեան" (Corrupt Political System) դէմ և որուն շուրջ կը հաւաքուի գիտակից և ուսեալ երիտասարդութիւնը Ամերիկայի, մեզ կը մղէ մտածելու թէ արդեօք այդպիսի քաղաքական սիստեմի հետեւանքը չէ՞ որ մենք չունինք այսօր առաջատար և արդիական զինուժով օժտուած բանակ։ Արաբական երկիրներու մէջ ապրած հայեր լաւ գիտեն ինչ կը նշանակէ բռնատէրերու կողմէ առաջ քշուող քարոզչութիւնը հայրենասիրութեան, որ ընդհանրապէս կը նետէ ժողովուրդը դէպի մարտիրոսացում և զոհաբերութիւն՝ յօգուտ այդ բռնակալի իշխանութեան պահպանման։

Ուրախութիւն է տեսնել հայ ժողովուրդը հայրենասիրութեամբ և մարտիրոսութեամբ տոգորուած Արցախի շուրջ։ Սակայն, թախիծը կը պատէ ուրախութիւնը երբ կը զգաս թէ քաղաքական փտած և կաշառակեր իշխանութիւնը կրնայ օգտուիլ մեր սքանչելի ժողովուրդի ազգայնական և հայրենասիրական զգացումներէն։