Փրոֆեսոր Վարսեն Աղաբեկեան նշանակուած է Պաղեստինեան Իշխանութեան նախարար

Լրատու, 29 մարտ 2024

Պատմաբան, մարդու իրաւունքներու պաշտպան, կառավարման եւ քաղաքականութեան խորհրդատու փրոֆեսոր Վարսեն Աղաբեկեան նշանակուած է Պաղեստինեան Իշխանութեան արտաքին գործոց եւ արտագաղթողներու հարցերով պետական նախարար։ Իր աշխատանքային յառաջխաղացման ընթացքին ան ղեկավար դեր խաղցած է պաղեստինահայ գաղութին մէջ:

Աղաբեկեան եղած է հասարակական կազմակերպութիւններու հիմնադիր անդամ եւ Պաղեստինի Եկեղեցական գործերու նախագահական բարձրագոյն կոմիտէի անդամ։ Ան աշխատած է համալսարաններու խորհուրդներու եւ իրաւապաշտպան կազմակերպութիւններու մէջ, եղած է Պաղեստինի մարդու իրաւունքներու անկախ յանձնաժողովի գլխաւոր յանձնակատարը:

Բացի այս բոլորէն, ան եղած է Բեթղեհեմի Սուրբ Ծննդեան տաճարի վերականգնման նախագահական կոմիտէի անդամ:

2021 թուականին Աղաբեկեան հեղինակած է «Պաղեստինահայ մը» (A Plestinian Armenian) հատորը՝ Սուրբ Տեղեաց հայոց 1600-ամեայ պատմութիւնը։ 2023-ին յաջորդեց «Գոյատեւման պատումը» (The Saga of Survival: Armenian Palestinians, the British Mandate and the Nakba) հատորը պաղեստինահայոց ժամանակակից պատմութեան մասին: Այս մենագրութեան մէջ դոկտոր Աղաբեկեան յատուկ ուշադրութիւն դարձուցած է պաղեստինեան Նաքպային (արաբերէն՝ «աղէտ») ու հայոց վրայ անոր ազդեցութեան։ «Նաքպա» բառը 1948-ին Պաղեստինի գրաւման առաջին փուլն ու պաղեստինցիներու առաջին զանգուածային տարագրութիւնը բնորոշող եզրն է արաբական աշխարհին մէջ:

Վարսեն Աղաբեկեան երրորդ հայն է, որ բարձր պաշտօնի կը կոչուի Պաղեստինեան Իշխանութեան (ՊԻ) կողմէ: Մանուէլ Հասսասեան եղած է ՊԻ-ի դեսպանը Միացեալ Թագաւորութեան եւ Դանիայի Թագաւորութեան մէջ, իսկ պատմաբան Ալպերթ Աղազարեան զբաղցուցած է ՊԻ-ի քաղաքական խօսնակի պաշտօնը:

Ի յաւելումն պատմութեան մասին իր երկու գիրքերուն, Աղաբեկեան գրած է բազմաթիւ ձեռնարկներ, յօդուածներ եւ ազգային զեկոյցներ Երուսաղէմի, կրթութեան, առողջապահութեան, երիտասարդութեան եւ կանանց խնդիրներու վերաբերեալ:

Արտաքին գործոց նոր նախարարն ունի երկու զաւակ եւ երկու թոռ:

 

Leave a Reply

Comments containing inappropriate remarks, personal attacks and derogatory expressions will be discarded.

Your email address will not be published. Required fields are marked *

You May Also Like