«Հայկական ժառանգութեան ամիս» Օնթարիոյի խորհրդարանէն ներս

Photo: Jason Banner

Պէթթի Տողրամաճեան, Թորոնթօ, 27 մայիս 2024

Երկուշաբթի, 27 մայիս 2024-ին Օնթարիոյի նահանգի խորհրդարանէն ներս՝ այդ օրէնսդիր մարմնի անդամ Արիս Պապիկեանի կազմակերպութեամբ տեղի ունեցաւ «Հայկական ժառանգութեան ամիս» խորագրով ձեռնարկը։

Հանդիսութեան ներկայ էին Օնթարիոյի նահանգի վարչապետ Տակ Ֆորտ, 30-է աւելի նախարարներ ու երեսփոխաններ, Օնթարիոյի երեք ընդիմադիր կուսակցութեանց ներկայացուցիչներ։ Հոն էին նաեւ Թորոնթոյի հայկական գաղութի կրօնական ու աշխարհական առաջնորդներ, Միսիսակայի, Քեմպրիճի եւ Սենթ Քեթրինզի շրջաններու հայ դէմքեր, քաղաքական ու հասարակական բազմաթիւ գործիչներ, կազմակերպութիւններու ներկայացուցիչներ, զանազան մարզերու երեւելիներ եւ ժողովուրդի մեծ բազմութիւն մը։

Ձեռնարկին ներկայ էին նաեւ Յունաստանի Թորոնթոյի մէջ հիւպատոս Բանաիոթիս Անթոնաթոսը, Լիբանանի Թորոնթոյի մէջ պատուոյ հիւպատոս Գրիգոր Փոսթաճեանը եւ բազմամշակութային փոքրամասնութիւններու՝ յոյներու, չինացիներու, ղպտիներու եւ քաղդէացիներու ներկայացուցիչներ։

Սրահի մուտքին տեղադրուած ուղեցոյցներ եւ հայկական տարազներով պարմանուհիներ ներկաները կ’առաջնորդէին դէպի սրահ, ուր կը գտնուէին Օնթարիոյի հայկական գաղութի առաջացման փուլերուն մասին պատմող ցուցանակներ։ Հայկական զարդանախշերով, ձեռարուեստի գործերով, գեղջկական իրերով, հայկական ազգային աւանդական տարազի պատկերներով եւ մանաւանդ հայկական գորգերով զարդարուած սրահը պահ մը հայերս տարաւ Հայրենիք:

Բարի գալուստի ողջոյնի խօսքն արտասանեց օրուայ հանդիսավար Արիս Մովսէսեան: Ան լուսարձակի տակ առաւ երեսփոխան Արիս Պապիկեանի նախաձեռնութեամբ վաւերացուած թիւ 105 օրինագիծը, որով Օնթարիոյի նահանգը իւրաքանչիւր մայիս ամիսը կը ճանչնայ որպէս «Հայկական ժառանգութեան ամիս»: Օնթարիոյի խորհրդարանը Գանատայի օրէնսդիր առաջին մարմինն է, որ ընդունեց այդպիսի օրէնք՝ յարգանքի տուրք մատուցելու Օնթարիոյի մէջ բնակող հայոց՝ գանատական հասարակութեան մէջ իրենց գործուն ներկայութեան, ներդրումին եւ բարի աւանդին համար:

Արիս Մովսէսեան ապա հրաւիրեց երեսփոխան Արիս Պապիկեանը իր խօսքն ուղղելու: Պարոն Պապիկեան շնորհակալութիւն յայտնեց վարչապետ Ֆորտին եւ նախարարներուն՝ թիւ 105 օրինագիծին իրենց միաձայն աջակցութեան եւ հայ գաղութին տրամադրած օժանդակութիւններուն համար:

Վարչապետ Տակ Ֆորտ իր խօսքին մէջ ջերմօրէն գնահատեց երեսփոխան Արիս Պապիկեանի գործունէութիւնը անցած վեց տարիներուն: Վարչապետը յայտնեց, որ պարոն Պապիկեան սերտ յարաբերութիւններ մշակած է թէ՛ այլ համայնքներու եւ թէ՛ պետական կառոյցներու հետ ու կամուրջ դարձած է անոնց եւ հայ ժողովուրդի զաւակներուն միջեւ։ Ան կարեւորութեամբ անդրադարձաւ հայ գործարարներու դերին՝ դրուատելով անոնց նախաձեռնութիւնները, մասնաւորաբար գործի հայթայթումը հայ գաղութի զաւակներուն եւ առհասարակ Օնթարիոյի նահանգի բնակիչներուն: Իր խօսքի աւարտին վարչապետ Ֆորտ իր անսակարկ աջակցութիւնը յայտնեց հայ գաղութին:

Ձեռնարկին ներկայ Մշակոյթի եւ քաղաքացիութեան նախարար Մայքըլ Ֆորտ իր արտասանած խօսքին մէջ շնորհաւորեց խորհրդարանի ներկայ անդամները եւ հայ ժողովուրդը, ապա ներկայացուց գանատահայութեան դերակատարութիւնը երկրի ընդհանուր հիւսուածքին մէջ: Ան կարեւորութեամբ ընդգծեց գաղութիս առաջնակարգ ներդրումը Գանատայի մշակոյթի իւրայատուկ դիմագիծի յառաջացման ու պահպանման մէջ։ Նախարար Ֆորտ նշեց, որ աշխարհի չորս ծագերուն մէջ հայերը մեծ շուքով կը տօնեն Մայիս 28-ը՝ Հայաստանի անկախութիւնը, որու 106-ամեակն է այս տարի։ Ան դիտել տուաւ, որ այս տօնը հայ ժողովուրդի ազատութեան, ժողովրդավարութեան եւ ինքնորոշման խորհրդանիշն է:

Նախարար Մայքըլ Ֆորտի խօսքին յաջորդեցին Օնթարիոյի երեք ընդդիմադիր կուսակցութեանց ներկայացուցիչներու սրտի խօսքերը։

Աջին՝ Վարչապետ Տակ Ֆորտ, իսկ ձախին՝ Երեսփոխան Արիս Պապիկեան

Այս առիթով երեսփոխան Պապիկեան պատրաստած էր գրքոյկ մը, որ կը բովանդակէ հայերու գաղթը դէպի Գանատա, հայոց հաստատուիլը Օնթարիոյի նահանգին մէջ, գաղութիս նշանակալի ներդրումը նահանգի ընկերային, մշակութային, կրթական, տնտեսական եւ քաղաքական հաստատութիւններուն մէջ, ինչպէս նաեւ արուեստի, գիտութիւններու եւ գրականութեան մարզերէն ներս։

Գրքոյկը կը ներառէ Հայոց ցեղասպանութիւնը, “ՃորՃթաուն պոյզ” մարդասիրական առաքելութիւնը, գանատացիներուն աջակցութիւնը հայ ժողովուրդին, Հայոց ցեղասպանութեան ճանաչումը դաշնային օրէնսդիր եւ գործադիր մարմիններու կողմէ եւ Գանատայի նիւթական օժանդակութիւնը ցեղասպանութենէն վերապրողներուն։ Գրքոյկը կը բովանդակէ նաեւ Երուսաղէմի հայկական գաղութին հակիրճ պատմութիւնը եւ հայ ստեղծագործողներու ներդրումները զանազան մարզերէ ներս։

Հանդիսութեան աւարտին երեսփոխան Արիս Պապիկեան յատուկ շնորհակալութիւն յայտնեց սոյն ձեռնարկի կազմակերպչական աշխատանքին եւ յաջողութեան նպաստած բոլորին, նաեւ բոլոր ներկաներուն ու մասնակիցներուն: Ան շնորհակալութիւն յայտնեց նաեւ նուիրատուներուն;

Ներկաները բարձր գնահատեցին ձեռնարկը, որուն նպատակն էր հայ մշակոյթն ու պատմութիւնը ծանօթացնել օտար շրջանակներուն, ինչպէս նաեւ ամրապնդել կապերը հայկական գաղութի երեւելիներուն եւ Օնթարիոյի նահանգի պետական ու քաղաքական գործիչներուն միջեւ։

*****

1 comment
  1. Ապրիք նման ուրախալի տեղեկութեան համար: Ապրի Պրն. Արիս Պապիկեանը որ նմամ ձեռնարկ կազմակերպած է։

Leave a Reply

Comments containing inappropriate remarks, personal attacks and derogatory expressions will be discarded.

Your email address will not be published. Required fields are marked *

You May Also Like