Ջոկատային (պարտիզանական) պատերազմի ժամանակն է, պետք է անցնենք հակահարձակման

29 Հոկտեմբեր 2020

ԱՆԴՐԱՆԻԿԵԱՆ ՈԳԻՈՎ ԳԵՆԵՐԱԼ  ԼԵՅՏԵՆԱՆՏ ԳԱԳԻԿ ՄԵԼՔՈՆԱՆԻ ԵԼՈՅԹԻՆ ԱՄՓՈՓՈՒՄԸ

Հայ ֆետայիին բնորոշ արտաքինով եւ Անդրանիկի ոգիով դաստիարակուած Գ. Լ. Գագիկ Մելքոնեան անցած է 1988-1994 Արցախի ազատագրութեան համար մղուած մարտերուն մէջէն եւ փայլուն յաջողութիւններ արձանագրած է յատկապէս ջոկատային (պարտիզանական) մարտերու ընթացքին: Այժմ ան կրկին անգամ ռազմաճակատի թէժ կրակներուն մէջ է նետուած: Վերջերս ան իր ելոյթով կարեւոր պատգամ փոխանցեց հայ ժողովուրդին: Ստորեւ կը ներկայացնենք ելոյթին գլխաւոր կէտերը: Փափաքողները կրնան դիտել ամբողջ տեսերիզը:

1) Թուրքազերիներ հաւատացած են որ իրենք անպատժելի են. իրենց համար հրադադարը ոչ մէկ արժէք կը ներկայացնէ:

2) Անոնք հաւատացած էին, որ իրենց հզօր զէնքերով քանի մը օրուան մէջ պիտի հասնին իրենց նպատակին: Անոնք չեն յաջողած մինչեւ օրս:

3) Մեր թիկունքին, Հայաստանի մէջ, երբ իրենց պատուհանները կը բանան եւ կը տեսնան թէ ամէն ինչ խաղաղ է, իրենց կը թուի թէ պատերազմը շատ հեռու է իրենցմէ: Պէտք է գիտնալ եւ հասկնալ թէ հայկական բանակը հերոսաբար կը կռուի եւ պատրաստ է շարունակել կռիւը մինչեւ յաղթական աւարտ:

4) Սա մեր վերջին պատերազմն է, կա՛մ պիտի յաղթանակենք կամ ալ 1915-ը մեր աչքին առջեւն է:

5) Մենք լաւ գիտենք որ մեր դէմ կը կռուին ահաբեկիչները տարբեր մահմետական երկիրներէ եւ ամբողջ աշխարհի առջեւ կը կատարուի նոյն ցեղասպանութիւնը: Մենք մեր յոյսերնիս պէտք է դնենք մեր վրայ. ամէն մէկ հայ պէտք է մտածէ թէ ինչ կրնայ ընել եւ ինչպէս կրնայ իր մասնակցութիւնը բերել:

6) Ամէն կարող հայ պէտք է զինական պատրաստութիւն ունենայ եւ այդպէս մեկնի ռազմաճակատ. պէտք է ըլլան մարտունակ:

7) Ռազմաճակատի վրայ գտնուող մեր հրամատարներու մեծ մասը չէ մասնակցած 90-ական թուականներու կռիւներուն: Անոնք իրենց ռազմական փորձերը կատարած զինավարժութիւններու ընթացքին եւ զինուորական կայաններու մէջ (պոլիգոն): Պատերազմը եւ պոլիգոնը (կը հնչուի՝ փոլիկոն) տարբեր բաներ են:

8) Կոչ կ’ընեմ մեր հրամանատարներուն եւ սպայական կազմին, որոնք 90-ականներու փորձ ունին՝ գան ճակատ եւ իրենց խորհուրդներով ու գիտելիքներով օգտակար ըլլան մեզի:

9) Ճիշդ կ’ըսեն որ մենք մեր բոլոր զինուժը չենք օգտագործած, բայց շուտով, երբ այլեւս դանակը մեր ոսկորին հասնի, այդ ժամանակ ամէն ինչն կ’օգտագործուի: Այժմ կարեւորը այն է որ մեր ժողովուրդի ոգին (դուխը-ռուս.) բարձր մնայ, իզուր տեղը խուճապի չմատնուի:

10) Պէտք չունինք եւ ճիշդ չէ մեր զոհուածներու անունները հրապարակել, ոչ ալ ցոյց տալ ինչ որ քարտէզներ: Սա պատերազմ է՝ կը յառաջանաս, կը նահանջես, կը սպասես, նորէն կը յարձակիս՝ մինչեւ վերջնական յաղթանակ: Տղաներու (զինուորներու) ուղղակի խնդրանքն է նման բաներ չընել, որովհետեւ այդպիսով դուք թշնամիին ոգի կու տաք ու կը քաջալերէք:

11) Մի՛ լսէք այն խօսքերուն որ իբր սնունդի պակաս կայ: Ո՛չ: Մենք ո՛չ մէկ սնունդի պակաս ունինք:

12) Հրաժարական եւ այլն պահնջողներուն մի՛ լսէք, մեզ ոգեւորութենէ զրկելու փորձ ընողներուն երեսին թքէք: Մենք այստեղ այդպիսիներու պատիժը կու տանք տեղն ու տեղը: Մենք ոչ մէկ թիզ հող տուող ենք: Թուրքազերիները չեն խնայելու այդպիսի լուրեր տարածողներուն կանանց ալ՝ նոյնիսկ եթէ ճակատին գրեն թէ իրենք ինչ ըրած են:

 

Ամփոփեց՝ Մ.Գ.

1 comment
  1. Աշխարհ գազինօ չէ որ երեք հազարամեայ ազգ մը իր ճակատագրով խումար խաղայ:
    Քաջութիւնը Աքիլլէսեան ժամանակներու զէնքն է : Այս դարուն կարրևոր են քաղաքագիտութիւնը, իրապաշտութիւնը, և ռազմավարութիւնը: Մեր առջև դրուած է գոյութենական հարց: Ամբոխավարութիւնը երբեք չի կրնար առաջնորդել կացութեան իսկական ըմբռնումին: Ոչ ալ կարելի է անզիջողականութիւնը շփոթել հայրենասիրութեան հետ: Հակառակորդէն պահանջել բան մը, որ ան չի կրնար տալ՝ յատկապէս այն պարագային երբ ան կը վայելէ համաշխարհային համամտութիւն իր կեցուացքին՝ պարզապէս անհնարին է առանց բռնի ուժի գործածութեան: Հայաստանի վարչապետին հրաժարումը բանակցային գործընթացէն՝ վերջնագիր մըն էր որուն մերժուելու պարագային Հայաստան իր նպատակին պիտի հասնէր ռազմական միջոցառումով:
    Արդ, ին՞չ իմաստ կը ներկայացնէ Հայաստանի իշխանութեան պախարակողական կեցուացքը՝ հանդէպ ադրբեջանական յարձակումին:
    Այս երևոյթը ոչ միայն անհասկնալի է ու դատապարտելի՝ այլև ազգ մը սպանդանոց տանելու յանձագործութիւն: Արարք մը, որ անհասանելի է մարդկային երևակայութեան: Կենսաբանութեան մէջ տարրական օրէնք է. այն էակը որ չի կրնար յարմարիլ իր միջավայրին՝ կը մահանայ: Ի՞նչ եզրակացնել բազմաթիւ հայերու, ներառեալ քաղաքական բարձր մակարդակի հասած պաշտօնակատարներու այն համոզումէն՝ թէ հայ և ազերի էթնիկներու գոյակցութիւնը անկարելի է: Այսինքն այս երկու ազգերէն մէկը պէտք է ոչնչանայ որ միւսը ապրի: Ես այս խօսքերը՝ որոնք արձանագրուած են միջազգային հարթակներու մէջ՝ կարդացեր եմ և լսեր կարգ մը հայերէ: Սակայն Ալիև երբեք նման հանրային արտայայտութիւն չէ ըրած, ինչքան գիտեմ:
    Արցախի լուծումը միջազգայնօրէն ընդունելի է երկու սկզբունքներու համադրումով. հողային ամբողջականութիւն Ատրբեջանի համար, և ինքնորոշման իրաւունք՝ Արցախի համար: Ասոնք են հիմունքները հարցի երկու կողմերու ցարդ համաձայնուած պայմաններուն, որոնք ծանօթ են Մատրիտեան Սկզբունքներ անունով: Վերանայուած տարբերակը՝ յուլիս 2009 թուին, կը կոչուի Helsinki Final Act: Բանակցութիւնները պիտի կայանան այս համաձայնութեան հիման վրայ: Արցախի հարցը պիտի ըլլայ ինքնորոշման լաւագոյն կարգավիճակ ձեռք ձքելու քաղաքական հեռատեսութեան մէջ: Բանակցութիւնները հաւանաբար ըլլան դժուար և երկար: Բայց հայ ժողովուրդը ուրիշ տարբերակ չունի իր վերապրումը և հետագայ զարգացումն ու բարգաւաճումը ամրահաստատ հիմերու վրայ տեղադրելու համար: Ի վերջոյ հաշտութիւն ըսուած բան մը կայ որ անպայմանօրէն պէտք է հետևի բոլոր պատերազմներուն: Միջազգայնօրէն ճանացուած, մինչև այսօր իր փիլիսոփայութեան հետևորդներ ունեցող՝ հայ և յույն ծնողքէ Վրաստան ծնած Կիւրճիեֆ խօսք մը ունի. «Եթէ կ’ուզես գիշերը հանգիստ քնանալ՝ դրացիիդ հետ բարեկամացիր»:

Leave a Reply

Comments containing inappropriate remarks, personal attacks and derogatory expressions will be discarded.

Your email address will not be published. Required fields are marked *

You May Also Like
Read More

«Եթե այսօր կորցնենք Սփյուռքի հայ ուսուցչին, կկորցնենք մի ամբողջ մշակույթ ու ժողովուրդ»

  Hedq, 16 Նոյեմբեր 2009 Սոնա Ավագյանի  հարցազրույցը  Խ.Աբովյանի անվան հայկական պետական մանկավարժական համալսարանի «Սփյուռք» գիտաուսումնական կենտրոնի տնօրեն,…
Read More