Պաշտպանենք Հայաստանեայց Առաքելական Սուրբ Եկեղեցւոյ կենսական շահերը

1 comment

1. Պատասխան Յակոբ Անդրէասեանին

   Յարգելի տոքթ. Աբրահամեան,

   Այսօր ստացայ «ԳԵՂԱՐԴ»ի նորագոյն ե-հրատարակութիւնը թուարկուած՝ 31 Մայիս 2020:

   Այնտեղ նշմարեցի թէ Ձեր խմբագրակազմը հրատարակած է Եռուսաղէմէն պր. Յակոբ Անդրէասեանի նամակը՝ գրուած 24 Մայիսին: Նոյն օրը այդ նամակը բարեկամի մը միջոցով ինծի փոխանցուած էր: Կարդալէս ետք, նոյն օրն իսկ պատասխան նամակ մը գրեցի ու ղրկեցի պր. Անդրէասեանին:
   Նամակիս մէջ, պր. Անդրէասեանի կողմէ ազատ մտածող եւ գործող լրագրողներուս հասցէին կատարուած անհիմն ամբաստանութիւններուն եւ ցեխարձակումներուն առթիւ ծագած շարք մը հարցումներ ներկայացուցած էի իրեն: Բայց աւա՜ղ, մինչեւ հիմա՝ 31 Մայիս, այդ հարցումները կը շարունակեն մնալ անպատասխան: Ինչ լաւ կ’ըլլար, ԹԱՓԱՆՑԻԿՈՒԹԵԱՆ սիրոյն, պր. Անդրէասեան այդ հարցումներուն անկեղծօրէն պատասխանած ըլլար որպէսզի բոլորս ալ քիչ մը աւելի լուսաբանուէինք:
   Ստորեւ՝ 24 Մայիս թուակիր պատասխան-նամակը: Շնորհակալ կ’ըլլամ եթէ այս մէկն ալ ներկայացնէիք «ԳԵՂԱՐԴ»ի ընթերցողներուն:

   Յարգանօք՝
   Աբօ Չափարեան
   Գլխ. Խմբագիր «ՀԱՅ ԿԵԱՆՔ» շաբաթաթերթի եւ USA Armenian Life Magazine-ի

   24 Մայիս 2020
   Լոս Անճելոս

   Յարգելի պր. Յակոբ Անդրէասեան,

   Նախքան պատասխանելս Ձեր անհիմն ցեխարձակումներուն՝ ուղղուած ազատ մտածող եւ անկախաբար գործող հետազօտող լրագրողներուս, պիտի խնդրէի որ պատասխանէիք հետեւեալ հարցումներուն.

   – Ըստ Ձեր տեղեկութեան կամ գիտութեան, Ռամկավար Ազատական Կուսակցութեան Մայիսի «Յայտարարութիւն»ը՝ «Ի Խնդիր Հայաստանեայց Առաքելական Եկեղեցւոյ Պայծառութեան», որո՞ւ կամ որո՞նց հասցէին ուղղուած է: Կամ՝ կը խորհի՞ք որ, բացի Գարեգին Բըըը-էն, ուրիշ որեւէ յստակ անձերու կամ դերակատարներու չէ ուղղուած:

   – Տեղեա՞կ էք որ Գարեգին Բըըը-ն ունի տարբեր թեմերէ ներս կլանակիցներ ինչպիսիք են Լոս Անճելոսի Յովնան Տէրտէրեանը, Մոսկուայի Եզրասը, եւ այլք:

   – Ձեր եւ Ձեր նմաններուն «ջայլամի քաղաքականութիւն»ը չէ՞ որ մեր ժողովուրդը մինչեւ հոս հասցուց:

   – Դուք Տէրտէրեանը կը պաշտպանէք որովհետեւ վերջինս տարին քանի մը հազար տոլա՞ր կը հանգանակէ ձեր տեղական կարիքներուն համար: (Ի միջի այլոց, անցեալ՝ 2019-ի աշնան Ձեր շրջանին համար անոր կազմակերպած հանգանակութիւնն ալ խոշոր ձախողութիւն մը եղաւ, որովհետեւ Հայաստանեայց Առաքելական Եկեղեցւոյ զաւակները ի Լոս Անճելոս՝ սկսած են ետ կանգնիլ որեւէ աջակցութիւն տալէ այն գրեթէ բոլոր ձեռնարկներուն որտեղ Տէրտէրեանի նախաձեռնութիւնը կամ մատը կայ):

   Ինչ լաւ է, որ Դուք ալ – թէկուզ կէսկատար – քաջութիւնն ունեցաք Ձեր դիրքը ճշդելու Հայաստանեայց Առաքելական Եկեղեցւոյ մէջ տիրող անփառունակ վիճակին եւ լայնատարած փտախտին հանդէպ:
   Անկեղծութիւնն ու ողջմտութիւնը կը պահանջեն որ իւրաքանչիւրս ամբողջական քաջութիւնն ունենանք անուններն ու իրերը կոչելու իրենց իսկական բնութագրութեամբ, նշելով այն բոլոր պարագլուխները, սկսած Գարեգին Բըըը-էն մինչեւ Մոսկուայի Եզրասը, մինչեւ Արեւմտեան թեմի Յովնան Տէրտէրեանը, նոյնպէս՝ անունները ջոկատ մը աշխարհականներու, որոնք մեղսակից են օրուայ դերակատարներու արարքներուն:
   Հայ. Առաք. Եկեղեցւոյ Արեւմտեան ԱՄՆ-ի առաջնորդ Յովնան արք. Տէրտէրեանն ու Ամենայն Հայոց կաթողիկոսութեան գահը զբաղցնող Գարեգին Բըըը-ն իմ հանդէպ միշտ ալ լաւ վերաբերմունք ունեցած են: Բայց ըլլալով անկախ եւ ազատ մտածող, ես նախընտրած եմ անոնց ու անոնց նմաններուն իմ հանդէպ լաւ վարուելակերպը ՉԸՆԴՈՒՆԻԼ որպէս կաշառք:
   Բոլոր հետազօտող լրագրողներուն պարտականութիւնն է իրողութիւններն ու դերակատարները ներկայացնել հարազատօրէն եւ անկեղծօրէն:
   Ուրախալի պիտի ըլլար Ձեր պատասխանները ստանալ վերեւը նշուած հարցումներուն:

   Լաւագոյնս՝
   Աբօ Չափարեան

   Reply