Սեփական Հայ Ծերանոցի 25 տարուայ երազին իրականացումը

(L-R) Harout Matossian, Aris Babikian MPP, Minister Paul Calandra, Sevag Khoshian, Vahan Ajemian, Hagop Torossian

Չորեքշաբթի, 9 Մարտ 2022-ին , ժամը 9:00-ին, Հայ Կեդրոնէն ներս, ներկայութեամբ Long-Term Care-ի նախարար Փոլ Քալանտրայի, երեսփոխաններ՝ Վենսենթ Քըի (Don Valley North), Ռապին Մարթինի (Eglinton-Lawrence) և Արիս Պապիկեանի (Scarborough-Agincourt), մեծ ուրախութեամբ յայտարարուեցաւ աննախընթաց ծրագիրը՝ կառուցելու և արդիականացնելու երկարաժամկէտ խնամքի ծառայող մահճակալներ (1,328 նոր և 641 բարելաւուած) եւ Թորոնթոյի մէջ ոչ-շահութաբեր ինը խնամքի տուներ:

Սոյն յատկացումէն Հայ Կեդրոնին կը տրամադրուին 256 նոր մահճակալներ Hallcrown տարեցներու նոր տան համար:

Այս առիթով երեսփոխան Պապիկեան շնորհակալութիւն եւ երախտագիտութիւն յայտնեց Օնթարիօ նահանգի վարչապետ Տակ Ֆորտին, նախարար՝ Փոլ Քալանտրային և նախկին նախարար Ատ Ֆիլիփսին, որովհետեւ իրենց զօրակցութեամբ եւ անսակարկ ներդրումով  Թորոնթոհայերը պիտի ունենան իրենց սեփական ծերանոցը ։ Աւելին՝ վերոյիշեալ ծրագիրը իրականացաւ Հայ Կեդրոնի եւ նահանգային կառավարութեան համատեղ գործակցութեամբ:

«Մեր կառավարութիւնը երկարաժամկէտ խնամքը բարելաւելու ծրագիր ունի, և այդ ծրագրի հիմնական մասը մեր տարեցներուն համար ժամանակակից, ապահով և յարմար տուներ կառուցելն է»,  արտայայտուեցաւ Փոլ Քալանտրան՝ երկարաժամկէտ խնամքի նախարարը: «Երբ Թորոնթոյի այս ինը տուները կառուցուին, 1,969 բնակիչներ կ՚ունենան նոր վայր, զոր կարող են տուն համարել՝ իրենց ընտանիքներուն և ընկերներուն մօտ»:

Հայ Կեդրոնի Ներկայացուցիչ Սեւակ Խօշեան իր խօսքին մէջ արտայայտուեցաւ ըսելով, «Հպարտութեամբ կը յայտնենք, որ պիտի մատուցենք մեր համայնքի բոլոր զաւակներուն, իրենց ամբողջ կեանքի ընթացքին՝ անզուգական ծառայութիւններ, մեր միութիւններով և կազմակերպութիւններով»։

«Հայ Ծերանոցի ծրագրի իրականացումով Թորոնթոհայերը ընդհանրապէս և հարաւային Օնթարիոյի Հայ գաղութը մասնաւորապէս՝ պիտի ունենան յաւելեալ բարեացակամ եւ բարգաւաճ կեանք, ի մասնաւորի մեր երէցները, որոնք արժանի են արդիական եւ արժանավայել  խնամքի, որուն ծառայութիւններէն առանց խտրութեան պիտի օգտուի հայութիւնը»:

«Եւ ի՞նչ պիտի ուզէր ալեհեր ծերունի մը՝ բացի լաւ սնունդէ, հոգատար բժիշկի մը հսկողութենէ, կաթիլ մը հետաքրքրութենէ, պտղունց մը ժպիտէ եւ վերջապէս իրեն հետ պարբերաբար զրուցող այցելուէ մը»:

«ԳԵՂԱՐԴ»Ի ԽՕՍՔԸ ԱՅՍ ԱՌԹԻՒ

Keghart.org ի սրտէ կը շնորհաւորէ այս ծրագիրը անցեալին եւ ներկայիս հետապնդած բոլոր հայրենակիցներն ու միութիւնները, ի մասնաւորի Հայ Կեդրոնի վարչութիւնը, որ կրցաւ իրականացնել վաղուց սպասուած Հայ Ծերանոցի ծրագիրը։ Փափաքելի պիտի ըլլայ որ խնամակալ մարմինը բաղկացած ըլլայ տարբեր հոսանքներէ եւ յարանուանութիւններէ նշանակուած հայրենակիցներէ՝ խուսափելու համար ապագայ ըսի-ըսաւներէ եւ բարդութիւններէ։

ՍՐՏԱԳԻՆ ԿՈՉ ԵՒ ՍՏՈՐԱԳՐԱՀԱՒԱՔ ՓՐԿԵՆՔ ՀԱՅԵՐԷՆԸ
Leave a Reply

Comments containing inappropriate remarks, personal attacks and derogatory expressions will be discarded.

Your email address will not be published.

You May Also Like
Read More

Ինչպէ՞ս Բացատրել

Յարութ Տէր Դաւիթեան, Լոս Անճելոս, 6 Մարտ 2013 Հայաստանի 2013-ի նախագահական ընտրութիւններէն անցած է երկու շաբաթ: Թէ՛ընտրութեան նախօրեակին…
Read More